Itsinda ry’abaganga bavura igifu n'amara risoje icyumweru cy’ubuvuzi bwihariye muri CHUB
#CHUB – 07 Ugushyingo 2025 – Kuri uyu wa Gatanu, taliki ya 07 Ugushyingo 2025, ku bitaro bikuru bya Kaminuza bya Butare (CHUB) hasojwe igikorwa cyamaze icyumweru cy’ubuvuzi bwihariye bwakorewe abarwayi bafite indwara zifata igifu n’amara.
Iki gikorwa cyakozwe n’itsinda ry’abaganga bavura indwara zo mu rwungano-ngogozi (Gastro-enterologists) baturutse mu bihugu bitandukanye, bibumbiye mu muryango ubahuza ku rwego mpuzamahanga, ku bufatanye n’urugaga rw’abaganga bavura izi ndwara mu Rwanda. Mu gihe cy’icyo cyumweru, abaganga bakoze isuzuma rinyuze mu cyuma cya Endoscopy na Colonoscopy, banavura abarwayi basanzwemo ibibazo bisaba ubuvuzi bwihuse cyangwa bukurikiranye.
Abaganga n’abakozi b’ubuvuzi bo muri CHUB bagize uruhare muri iki gikorwa, bikaba byarabaye umwanya mwiza wo kungurana ubumenyi no gukomeza kongerera ubushobozi abaganga b’u Rwanda mu kuvura indwara zifata igifu n’amara.
Iki gikorwa cyagize uruhare rukomeye mu kongera serivisi zihariye zihabwa abarwayi, kugabanya igihe cyo gutegereza serivisi, no guteza imbere ubumenyi mu buvuzi bwihariye.
CHUB ikomeje gushimangira ubufatanye n’inzobere zo mu gihugu no ku rwego mpuzamahanga hagamijwe guteza imbere ubuvuzi bugezweho no kongera amahirwe y’abarwayi babona serivisi zihariye ku gihe.
By NTAWURUSHIMANA Jean Nepomuscene
PR/CHUB