Laboratwari ya CHUB yahawe icyemezo mpuzamahanga gishimangira ubuziranenge cya ISO 15189:2022
#CHUB – 01 Ukuboza 2025 – Kuri uyu wa Mbere, taliki ya 01 Ukuboza 2025, ubuyobozi n’abakozi b' ibitaro bikuru bya Kaminuza bya Butare (CHUB) bishimiye kwakira icyemezo cyemeza ko Laboratwari y’ibi bitaro yujuje ibisabwa ku rwego mpuzamahanga mu gupima no gusuzuma ibizamini bitandukanye.
Iki cyemezo gitangwa na International Organization for Standardization (ISO) kikaba gifite nimero ISO 15189:2022, kikaba gihamya ko Laboratwari ya CHUB ikora isuzuma ry’ibizamini bya laboratwari hakurikijwe amahame mpuzamahanga agenga ubuziranenge, imikorere inoze, n’ubunyamwuga mu gutanga ibisubizo byizewe.
Iki cyemezo kije ari igishimangira ibyo Laboratoire ya CHUB yarisanganywe yagiye ihabwa mu bihe byabanje, kikaba ari n'inkingi yubaka icyizere cy’abagana CHUB n’abafatanyabikorwa, kuko ryerekana ko ibisubizo bitangwa na laboratwari byubahiriza ibipimo ndetse n'ibindi byaba bisabwa ku rwego mpuzamahanga haba mu mikorere, imicungire y’ubuziranenge, ndetse no mu bushobozi bw’abakozi.
Ubuyobozi bwa CHUB bwagaragaje ko iki cyemezo ari umusaruro w’imbaraga zashyizwe mu guteza imbere ubuziranenge bwa serivisi, guhugura abakozi, no kunoza imikorere ya laboratwari, hagamijwe gutanga ubuvuzi bunoze kandi bwizewe.
CHUB ikomeje gushyira imbere gahunda zo kuzamura ireme rya serivisi z’ubuvuzi no gukomeza kubahiriza amahame mpuzamahanga, mu rwego rwo kurushaho kunoza serivisi zihabwa abarwayi no guteza imbere ubuvuzi mu Rwanda.
By NTAWURUSHIMANA Jean Nepomuscene
PR/CHUB