Abanyarwanda bakunze kuvuga ko ibuye ryagaragaye riba ritakishe isuka! Ubushakashatsi ni inkingi ya mwamba mu kuvumbura indwara zitandukanye ziba zugarije abaturage, bwifashishwa kandi mu kuvumbura imiti ikwiriye mu kuvura indwara, kuvumbura inkingo zikoreshwa mugukumira ko indwara zatuzahaza ndetse no mukugaragariza abavuzi uko bakwiye kwitwara imbere y’ ibibazo by’ uburwayi abaturage baba babagaragariza. Iterambere ry’ ubushakashatsi mu buvuzi riganisha ku iterambere ry’ urwego rw’ ubuvuzi mu gihugu igihe byitaweho neza hagamijwe gusubiza ibibazo byugarije abaturage bakenera serivisi z’ ubuvuzi. Ibitaro bikuru bya Kaminuza bya Butare CHUB bifite intego yo kuzamura ireme ry’ ubushakashatsi mu buvuzi ndetse no gukorana n’ abafatanyabikorwa mu bushakashatsi.

Ifoto: abakozi ba CHUB bereka abashakashatsi baturutse muri IVI ibikoresho bya labo byafasha mu bushakashatsi

Umuyobozi mukuru w’ ibitaro bya CHUB, Dr NGARAMBE Christian asobanurira abashakashatsi baturutse mu kigo mpuzamahanga gikora ubushakashatsi ku nkingo (IVI) ibikoresho CHUB ifite byafasha abashakashatsi kugera ku ntego

Ubushakashatsi mu rwego rw’ ubuvuzi bukenera ibikoresho byihariye cyane cyane imashini zigezweho zipima ibizamini byo muri laboratoire ndetse n’ ibindi bikoresho bigezweho by’ ikoranabuhanga mu buvuzi. CHUB yubatse uru rwego ndetse ibikoresho bigezweho birahari, hari n’ umuhate wo kugenda hongerwamo ibindi uko ubushobozi bugenda buboneka.

CHUB, mu rwego rwo gutanga umusanzu mu murongo mugari w’ igihugu wo guteza imbere ubushakashatsi mu buvuzi butanga ibisubizo ku baturage, yibanda ku gushishikariza abakozi kwita ku bushakashatsi, gushyiraho uburyo bworohereza abakora ubushakashatsi no kunoza imikoranire n’ ibigo bitandukanye mu bushakashatsi haba mu gihugu cyangwa mu mahanga.

By NTAWURUSHIMANA Jean Nepomuscene, PR/CHUB