#CHUB – Kuri uyu wa 15 Mutarama 2026, ubuyobozi bw' Ibitaro bikuru bya Kaminuza bya Butare (CHUB) bwateguye inama nyunguranabitekerezo n’abakozi bahagarariye bagenzi babo mu mashami atandukanye y’ibitaro, igamije gusuzuma ibyagezweho mu mwaka washize, kuganira ku mihigo y’igihembwe cya kabiri dushoje, kugaragaza imbogamizi zabangamye mu guhigura imihigo, no gufata ingamba zigamije kwesa imihigo y’ibihembwe bisigaye.

Inama yitabiriwe n’abahagarariye abakozi baturutse mu mashami yose ya CHUB, bafashwa kwegerana baganira ku musaruro w'ibyagezweho mu gihembwe gishize cya 2, basuzuma imikorere ya buri shami bibanda ku kugaragaza imbogamizi zagaragaye mu gihembwe gishize, no gusangira ibitekerezo kubyakorwa neza kurushaho mu bihembwe bikurikira mu rwego rwo gutera intambwe ziganisha ku ntego z'ikigo.

Abitabiriye inama banaganiriye ku ngamba zafasha gukomeza kwesa imihigo, hibandwa ku kunoza serivisi zihabwa abarwayi, gukomeza imikoranire myiza hagati y’abakozi, no guteza imbere ireme rya serivisi zitangwa. Hanagarutswe ku buryo bwo gukurikirana ishyirwa mu bikorwa ry’imihigo yihutirwa, kugabanya imbogamizi mu mikorere, no gufata ingamba zigamije kunoza umusaruro mu bihembwe bisigaye.

Ubuyobozi bwa CHUB bwashimangiye ko gufatanya, guhanahana amakuru, no gukorera hamwe ari inkingi z’ingenzi mu kugera ku ntego z’ibitaro, bunashimira abakozi uruhare bagira mu gutanga serivisi zinoze no guteza imbere imikorere y’ibitaro. Inama yagaragaje inyungu ikomeye mu gushimangira ubushake bwo gukomeza kunoza imikorere, kungurana ibitekerezo, no guhuza imbaraga mu guhigura imihigo.

Igikorwa cyasozwe n’umwanya wihariye wo kwifurizanya umwaka mushya wa 2026, aho abayitabiriye basangiye ibyishimo n’ishyaka ryo gukomeza guteza imbere serivisi z’ubuvuzi #CHUB.

By NTAWURUSHIMANA Jean Nepomuscene

PR/CHUB