Kuri uyu wa Kane taliki ya 01 z’ukwezi kwa Gatanu 2025, abakozi ba CHUB basabanye n’ abayobozi babo mu mikino itandukanye yagiye ihuza amashami atandukanye mu bagore n’abagabo hagamijwe kwishimira ibyagezweho babigizemo uruhare ntagereranywa ndetse no kwiha intego y’imihigo igomba kweswa mu bufatanye busanzwe buranga ubuyobozi n’abakozi ba CHUB.

Nk’uko bisanzwe, CHUB iha agaciro siporo kuko ni ubuzima! Siporo ifasha abakozi kuruhuka nyuma y’akazi katoroshye bakora, ibafasha mu kubungabunga ubuzima bwabo, kurwanya indwara zitandura ndetse siporo igira uruhare rukomeye mu busabane bw’abakozi biza no gutuma bafatanyiriza hamwe mu kunoza umurimo. Ni muri urwo rwego ubuyobozi bwa CHUB bubinyujije muri komite ishinzwe siporo muri CHUB buhuza amashami atandukanye, mu mikino itandukanye, mu byiciro bitandukanye hagakinwa imikino mu bihe bitandukanye bisozwa ku munsi w’abakozi, nyuma hagakorwa ubusabane n’ubuyobozi ari naho hahembwa amakipe cg abakozi bitwaye neza muri iyo mikino.

Ku munsi w’abakozi kandi hahembwa abakozi batoranywa na bagenzi babo nk’indashyikirwa mu guhanga udushya no gutanga serivisi z’indashyikirwa muri buri shami. Muri bamwe baba batoranyijwe mu mashami atandukanye, hatorwamo umwe muribo nawe uhiga abandi akaba ari nawe uhembwa nk’indashyikirwa mu rwego rwa CHUB.

Kuri uyu munsi w’ubusabane n’abakozi, umuyobozi mukuru w’agateganyo wa CHUB, Dr. Ngarambe Christian yashimiye buri mukozi wese wa CHUB ku ruhare rutagereranywa agira mu iterambere rya serivisi zitangirwa CHUB, ahemba abakozi b’indashyikirwa batoranyijwe na bagenzi babo, ndetse ahemba na Mme KAMALIZA Georgette usanzwe ashinzwe imishahara mu ishami rishinzwe abakozi wahize abandi aba umukozi w’indashyikirwa mu mwaka wa 2024-2025. 

By NTAWURUSHIMANA Jean Nepomuscene

Ushinzwe inozabubanyi n’itumanaho