Umunyamabanga Uhoraho wa Minisante yasuye CHUB, baganira ku mishinga migari y’iterambere
#CHUB – Ku italiki ya 12 Mutarama 2025, Ibitaro bikuru bya Kaminuza bya Butare (CHUB) byakiriye Umunyamabanga Uhoraho wa Minisiteri y’Ubuzima (Minisante), Bwana Ndayizigiye Jean Marie Vianney, mu ruzinduko rwari rugamije gusura imishinga migari iri gukorerwa muri ibi bitaro no kuganira ku iteganyijwe gukorwa mu gihe kiri imbere.
Muri uru ruzinduko, hasuwe ibikorwa bitandukanye bigamije guteza imbere serivisi z’ubuvuzi, kunoza ibikorwaremezo, no kongera ubushobozi bw’ibitaro mu kwakira no kuvura abarwayi. Uru ruzinduko rwabaye kandi umwanya wo kungurana ibitekerezo ku mishinga iteganyijwe, hagamijwe gukomeza guteza imbere ubuvuzi no kongera ireme rya serivisi zihabwa abaturage.
Mu biganiro byahuje impande zombi, hibanzwe ku kamaro ko gukomeza gukorera hamwe no gufatanya mu bikorwa by’ubuvugizi, hagamijwe gushaka inkunga n’ubushobozi bukenewe kugira ngo iyo mishinga izashyirwe mu bikorwa neza, ku nyungu z’abaturage bazayungukiramo.
Ubuyobozi bw’Ibitaro bikuru bya Kaminuza bya Butare (CHUB) bwashimye uru ruzinduko nk’intambwe ikomeza gushimangira ubufatanye hagati y’inzego zitandukanye mu guteza imbere urwego rw’ubuzima, bunagaragaza ko ibitaro bizakomeza kugira uruhare rufatika mu ishyirwa mu bikorwa rya gahunda zigamije kunoza serivisi z’ubuvuzi mu Rwanda.
By NTAWURUSHIMANA Jean Nepomuscene
PR/CHUB