Uyu munsi, ku wa mbere taliki ya 08/09/2025, Nyakubahwa Minisitiri w'ubuzima Dr. Sabin NSANZIMANA yagiriye uruzinduko mu bitaro bikuru bya Kaminuza bya Butare #CHUB asura serivisi zitandukanye ndetse anaganira n'abakozi bahagarariye abandi mu rwego rwo kurushaho kwakira no gusubiza ibyifuzo by'abakozi, no kujya inama ku mishinga migari iri gukorwa.

Nyakubahwa Minisitiri w’ubuzima yasuye by’umwihariko serivisi ya Radiology iherutse kwakira ibikoresho bifite ikoranabuhanga ryisumbuye mu gupima indwara harimo sikaneri (CT-Scan) izunganira iyarisanzwe mu gupima indwara zitandukanye mu buryo bwisumbuye, Echography ipima indwara zo mu nda ndetse n’ahandi muganga yabonye ari ngombwa, Fluoroscopy ifasha mu gupima byisumbuye indwara z’amagufwa, ifasha mu gukora ibizamini byihariye biba bikenewe mu gupima indwara zifata amara, indwara zituma umuntu atibaruka (ubugumba), Mammography (Imashini ikoreshwa mu gupima kanseri y’ibere), X-Ray ( Icyuma cyifashishwa mu gupima imvune z’amagufwa, etc..).

Mu mishinga hasuwe iyarangiye nka parikingi y’abakozi aho yorohereje abakozi kubona aho baparika ariko bikanafasha abarwayi kwisanzura kuko basigiwe parikingi yarisanzwe ndetse n’ingobyi z’abarwayi (Ambullances) zizana abarwayi zikaba zisigaye zibasha kwisanzura. Hasuwe kandi umushinga washojwe wo kwagura inzu ifasha imiryango yagize ibyago byo gupfusha kubasha kubona aho bashyira umurambo ku buryo utakwangirika kandi ubitswe igihe kirekire. 

Mu mishinga iri gukorwa yasuwe harimo inyubako igeze ku kigero cya 90% izajya yifashishwa mu bushakashatsi no kwigisha abakozi bo mu buvuzi muri gahunda yo kwihutisha gukuba 4 abakozi bo mu buvuzi mu gihe cy’imyaka 4, inyubako yo kwagura Laboratoire kugirango yongererwe ubushobozi mu gupima indwara, ndetse hasurwa n’ahari gutegurirwa kuzakira imashini ya MRI iteganyijwe kwakirwa mu gihe cya vuba.

Nyuma yo gusura ibi bikorwa, Nyakubahwa Minisitiri w’ubuzima waruherekejwe n’umunyamabanga-nshingwabikorwa w’intara y’Amajyepfo Bwana NSHIMIYIMANA Vedaste na Mayor w’akarere ka Huye Bwana SEBUTEGE Ange, yagiranye inama n’abakozi bahagarariye abandi. Muri iyi nama, umuyobozi mukuru w’agateganyo wa #CHUB Dr. Ngarambe Christian yafashe umwanya agaragaza mu buryo burambuye uko CHUB ihagaze mu bikorwa ikora, imishinga yakozwe, iri gukorwa ndetse n’iteganyijwe gukorwa mu rwego rwo kurushaho kuzamura ireme rya serivisi. 

Mu ijambo rya Nyakubahwa minisitiri w’ubuzima yashimiye #CHUB ku bikorwa byiza byakozwe, isuku iharangwa, ubufatanye buhagaragara mu gutanga serivisi ndetse n’imbaraga zishyirwa mu gukurikirana imishinga kugirango itange umusaruro uba utegerejwe mu nyungu z’abanyarwanda bose. Yagarutse ku mishinga migari #CHUB iteganya ndetse anemera ko agiye gukurikirana byihariye umushinga wo kubaka inzu izajya ifasha abarwayi bivuza bataha, inzu y’indembe, dialyse, inzu ivurirwamo abana bavuka batujuje igihe ndetse n’indi mishinga igamije imibereho myiza y’abakozi.

Mu gusoza yashimiye abayobozi bamuherekeje gusura #CHUB, ashimira abakozi bose, abizeza ko minisiteri y’ubuzima ibari hafi mu ntambwe zose batera hagamijwe kuzamura ireme rya serivisi.

By NTAWURUSHIMANA Jean Nepomuscene

PR/CHUB